![[Link] Website - Provinzia autonoma de Bulsan - Südtirol](/css/img/APBZ_Logo_Website_DE_IT_LAD.svg){kind=logo}
Nsci nuzëis la plata web
Scuvride l Portal meteo nuef dl Südtirol
Cun chertes y diagrams interatifs coche nce cun funzions da adaté individualmënter giapëis riesc y intuitivamënter duta la nfurmazions mpurtantes.
Sun la plata de scumenciamënt udëis te na sëuravijion l tëmp da ncuei, i favoric che ëis cris ora per i chemuns y la webcams atueles. Tres la funzion zoom sun vosta cherta dl Südtirol interativa pudëis udëi la previjions dl tëmp per duc i 116 chemuns dla provinzia. Sce ulëis va chësc nce tl modus a scherm ntier o n basa a vosta pusizion atuela.
Nce la persones che va gën da mont su giapa cie che les se mbincia: L tëmp sa mont pieta previjions per la set grupes de crëps dl Südtirol y mostra la tendënzes plu mpurtantes per i dis che vën.
Nueves defin ie la chertes meteorologiches georeferenziedes. I parametri mustrei sun la chertes – coche la prezipitazions, la populazion, la temperatura y nsci inant – nes dà na sëuravijion atuela dla situazion dl tëmp. Ora de chël pudëis mudé sun la cherta zënza problems danter i dac passei y chëi che reverda l daunì. Cride ora nstësc y nstësses!
Cun l widget dl Servisc meteorologich provinziel pudëis saurì mëter ite la previjions dl tëmp sun vosta plata web.
Leprò giapëis da ciarië ju duta la previjions dl tëmp t la forma de n documënt PDF.
Cun n design responsif, na navigazion saurida y zënza rëms, tëmps de ciariamënt asvelc y pusciblteies de filtré flessibles funziuneia l portal meteo bën sun uni njin y ie saurì da manejé.
Nosc servijes meteo
La plata web ie la ntreda al portal meteo. Tlo unieis al savëi l tëmp da ncuei tl Südtirol. Sun la cherta geografica udëis i simboi dl tëmp y dessot la previjion dl tëmp tla forma de n test che nosc meteorologs crieia uni di. Dajëdeti nce arta ala ndicazions n cont dla fidabltà: les mostra tan prezises che la previjions ie.
Dala plata web ruvëis tres l pom “Previjions per i dis che vën” al tëmp tl Südtirol cun la previjions per i dis che vën.
Prezipitazion: radar y previjion
I dac sun l tëmp cherdei ju plu suvënz tl Südtirol reverda la prezipitazions. Perchël udëis chësta nfurmazions diretamënter sun la plata web:
- Radar meteorologich cun la prezipitazions atueles. N tlich sun la imaja ve mëina ala cherta dl tëmp “radar, tarluies y satelit”. Udëis la cherta cun l filter cris ora che cuntën i dac dla prezitazions atueles.
- Previjions dla prezipitazions. N tlich sun la imaja ve mëina ala cherta dl tëmp “Analises y previjions”. Pudëis udëi la cherta cun l filter cris ora che ve mostra i dac de previjion tla ressoluzion atualiseda uni ëura da nuef.
Favoric
Sun la plata web udëis oradechël i chemuns y la webcams che ëis seleziunà coche favoric.
I favoric vën salvëi te vosc browser. Sce l cache, la memoria dl browser, vën cancelà va nce vosc favoric perdui. Lijëde n chësc cont deplù tla pert "Favoric" sun chësta plata.
Pudëis udëi l tëmp tl Südtirol “ncuei” sun la plata web. Tres l pom "Previjions per i dis che vën" ruvëis sun la plata "L Tëmp tl Südtirol". "L Tëmp tl Südtirol" cuntën la previjions per i cin-sies dis che vën.
La Cherta dl Südtirol mostra la icones per la previjions te duc i 116 chemuns de nosta provinzia. I chemuns ie da udëi sce n ngrandësc la cherta. Chësc va sce tlichëis l "Plus +" sun la cherta o tres la cumbinazion Ctrl/Strg y rodela dla mouse.
L tëmp ie a despusizion per duc i 116 chemuns dl Südtirol. Sun la plata de sëuravijion pudëis crì ora danter la visualisazion a schedes o a tabela. La doi manieres de visualisazion ie da crì ora tla vëta de crissa.
La plata de sëuravijion mostra la nfurmazions prinzipeles sciche l simbol meteorologich, la temperatura minima y mascima, la prezipitazions y l’ëures de surëdl. Seleziunan n chemun ruven ala ududa ala menuda, ulache l ie da garat la previjions per ncuei y per i 5-6 dis che vën. I dac ie reprejentei tla forma de n diagram, cun ndicazions sun la temperatures y prezipitazions ajurnedes tl ritm de trëi ëura.
Visualisazion sun la cherta
Te chësta sezion ne iel deguna cherta. Sce ulessais udëi i dac sun la cherta jide ala plata web o ala plata Tëmp tl Südtirol. La cherta mostra la icones dla previjions per duc i chemuns. I inuemes di chemuns ie da udëi ngrandian la cherta cun l pom “+” o cun la cumbinazion Ctrl/Strl + rodela dla mouse.
Favoric
Seniede vosc favoric persunei cun n tlich sun l cuer cueciun. I favoric unirà ora sibe sun la plata de sëuravijion sibe sun la plata web (al plu 4 favoric). L ie mpurtant savëi che sce l vën cancelà cache o dac dl browser vëniel nce tëut y tres i favoric y i messerà unì seleziunei da nuef.
Stampé
Sun uni plata de detail possen stampé la previjions se nuzan dl pom "Stampa" japé.
Per mo d’autra previjions da desćiarië y stampé cunsultëde i buletins meteo tl format PDF.
L tëmp sa mont tl Südtirol mostra na sëuravijion cun la previjions per ncuei y duman.
Ora de chël pudëis cunsulté la previjions per i 6 dis che vën per la 7 grupes de crëps dla provinzia, cun dac ajurnei sun prezipitazions, vënt y temperatura.
La cherta "Radar, tarluies y satelic" dà na sëuravijion ntiera dla situazion meteorologica atuela y vën ajurneda uni cin’ menuc. La mostra prezipitazions, la probablità de tampesta y la grandëza di graniei de tampesta basedes sun l radar dl Gantkofel, y nce i traluies registrei. Ora de chëI pieta la imaja satelitera Meteosat ajurneda uni 15 menuc nfumazions sun l asniblamënt.
La cherta "Analises y previjions", ntant sce, mostra prezipitazions, nibles, temperatures y bueles de vënt cun ressoluzion da ëura a ëura. I dac muserei y la previjions possa ie da cunsulté sun la medema cherta.
Co se nuzé dla vëta de cuntrol
La chertes meteo à da garat “lijëndes” per uni parameter, funzion de zoom, localisazion dla pusizion y modalità a scherm ntier.
Cun l’icona dl maneslos possen fermé l raion dla cherta mantenian medemi zoom, raion visualisà y trat de tëmp. Chësta funzion vel sibe per i dac de analisa sibe per la previjions, a na moda che n possa cunfrunté saurì layer defrënc o orares zënza mudé la visualisazion.
L ie mesun ativé l ajurnamënt automatich ntan la navigazion: uni 5 menuc vëniel ciarià su automaticamënter dac y imajes nueves, nsci arëis for a despusizion la nfurmazions plu atueles.
La velozità o slune (FPS) mostra tan aslune che l’animazion vën reprodujeda sun la cherta. 2 FPS uel dì che l vën mustrà doi fotograms al secunt. Nsci àn na visualisazion che va plan y ie tlera a na moda da pudëi udëi saurì l svilup dl tëmp. N possa crì ora danter 1 y 6 FPS.
La stazions meteorologiches ie njins che registrea dac sciche la temperatura, l tume, la prescion atmosferica, l slune dl vënt y la prezipitazions. Les à na lingia de sensores che mesura y registrea tresora chisc valores.
Tl Südtirol iel ntëur n 60 stazions meteorologiche de valeda, n 40 stazions meteorologiches da mont y feter 30 stazions de mesurazion dl livel d’ega di ruves. Chësta ultimes mesura, danter l auter, l livel dl’ega, l’ega meneda y la temperatura dl'ega.
Sun la plata web vën i dac ajurnei uni 15 menuc.
Ciariede ju saurì i buletins meteo atuei per l Südtirol y per l tëmp da mont tl format PDF.
Duc i buletins ie a despusizion te duc i lingac:
- L tëmp tl Südtirol – sëuravijion,
- Tëmp da mont – sëuravijion,
- Tëmp da mont per la set grupes de crëps.
Per l Tëmp tl Südtirol iel ora de chël da garat na verscion tla doi rujenedes tudësch y talian.
L ne ie degun buletin PDF per l tëmp ti chemuns. Ma l ie mesun stampé diretamënter uni plata detalieda de n chemun se nuzan dl pom "Stampa" japé.
Favoric
Seniede cun n cuer cueciun i buletins che ulëis sciche vosc favoric persunei. I favoric vën for visualisei sainsom dla plata y ie riesc azessibli.
La lista di favoric vën salveda localmënter te vosc browser (p.ej. Chrome, Edge, Firefox). Sce cancelëis la caches o i dac dla plata vëniel nce tëut demez i favoric y i messerà unì seleziunei da nuef.
Plu degun abunamënt e-mail
Cun l portal meteo nuef ie l abunamënt e-mail ai buletins unì dejativà.
A chësta maniera limitons de truep l mandé de dac y vosc castl dala posta e-mail ne vën nia sëuraciarieda da nutizies.
Pudëis alincontra crië vosta cerduda persunela: jide uni di a cialé i servijes meteorologics che ulëis udëi y salvëdi coche favoric. La gestion di favoric vën fata diretamënter sun chësta plata.
Sun l portal meteo nuef ne iel nia plu a despusizion l buletin per i raions cumprensoriei.
Ma mpede chësc pudëis cunsulté:
- l tëmp ti chemuns,
- l tëmp sa mont per la set grupes de crëps dl Südtirol.
Sun la plata Webcam giapëis na panoramica cun imajes live da duta la provinzia – valedes, ziteies y crëps. A chësta maniera pudëis avëi te uni mumënt na ududa realistica dla cundizions meteorologiches y dla cuntreda. La plata dla webcams cumpletea visivamënter i dac meteorologics, l radar te n tëmp reél y la previjions.
Pudëis ora de chël mpusté vosc favoric danter la webcams. Chisc vën mustrei automaticamënter sun la homepage y salvedes per vosta vijites suzessives. Sce tulëis demez la cache dl browser o i dac dla plata va nce i favoric perdui y i messerà unì seleziunei da nuef.
La majera pert dla webcams ie de proprietà dla RAS y les ie sëniedes aldò.
L diagram dl föhn mostra la defrënza de prescion atmosferica preududa danter Bulsan y Dispruch te hPa, da chëla che l possa unì a se l dé la cundizions de vënt prududes sun l’Elpes. Majera che ie la defrënza de prescion y plu sterch che ie l vënt de föhn y plu inite che l va tla valedes.
- Valores negatifs ndichea föhn dal nord tl Südtirol.
- Valores positifs ndichea föhn dal sud sun la pert nordalpina.
L diagram vën ajurnà doi iedesc al di: dala 10:00 y dala 22:00.
I grafics interatifs mostra l andamënt dla temperatura mascima y dla prezipitazion al di ti set raions cumprensoriei per i diesc dis che vën do.
La tendënzes dla temperatures y dla prezipitazions vën ajurnedes trëi iedesc al di. I culëures y la linies ndichea l svilup plu probabl y la fases de melsegurëza.
Cun l widget dl Servisc Meteorologich Provinziel pudëis mëter saurì l buletin meteo diretamënter te vosta plata web.
Pudëis crì ora danter l widget cun la previjions da 3 dis o l widget cun la visualisazions cartografica dl di che ie.
Funzions nueves
La cherta interativa pieta na funzion de zoom. Pudëis nce ativé vosta pusizion dl mumënt.
L ie ënghe mesun visualisé la cherta a scherm ntier. Per fé chësc iel n pom aposta tla cherta.
Sce n tlica sun l simbol dl Südtirol ruvëis inò pra la visualisazion de scumenciamënt.
La cherta ie da garat sun plates defrëntes dla homepage y mostra de plu parametri, sciche la temperatura dl’aria o la prezipitazions. Pudëis ativé o dejativé i dac tres l pom aposta.
Tla chertes meteo georeferenziedes pudëis regulé l slune dl’animazion. Per ejëmpl, ndichea 2 FPS la visualisazion de doi imajes al secunt.
D’autra funzions ie descrites tla sezion che vën do, “Vëta de cuntrol dla chertes meteo”.
La chertes meteorologiches interatives mostra dac georeferenziei per parametri defrënc: prezipitazions, curidura de nibles, temperatura, vënt, tarluies y, d’instà, tampesta. Uni cherta cuntën na lijënda che juda a liejer y nterpreté a drët i valores.
La chertes pieta:
- funzions de zoom,
- relevamënt dla pusizion,
- visualisazion a scherm ntier,
- reseté la visualisazion tres la icona Südtirol.
L slune dl’animazion (FPS) ndichea tan de imajes che vën reprodujedes uni secunt. Per ejëmpl mostra 2 FPS doi imajes al secunt per n’animazion che va plu plan y ie plu tlera. L ie puscibl crì ora danter 1 y 6 FPS. L’animazion possa unì nvieda via o metuda n paussa tres l pom aposta.
Tres l simbol dl maneslos possen fissé la preferënzes dates, ne mudan nia zoom, purzion visualiseda y trat de tëmp. Chësta funzion vel sibe per i dac de analisa sibe per la previjions y la sauridea l cunfront danter layer o mumënc de tëmp defrënc.
L ie ora de chël puscibl ativé l ajurnamënt automatich tres l simbol "refresh": ntan la navigazion vëniel ciarià uni 5 menuc imajes y dac nueves a na maniera da avëi for nfurmazions ajurnedes.
N possa mpusté i favoric persunei sun chësta plates:
- Meteo di chemuns,
- webcam,
- stazions meteo sa mont, stazions meteo de valeda, stazions de mesurazion dl livel dl’eghes,
- buletins meteo.
I favoric ie vosta lista de cuntrol persunela. Marchëde vosta preferënzes cun l cuer cueciun. Nsci pudëis debota udëi cie che ie plu mpurtant per vo: I chemuns y la plates web che ve nteressea deplù vën mustredes diretamënter sun la homepage.
La plata "Mi favoric" ve pieta na sëuravijion de vosta preferënzes crisses ora y pudëis for les gestì coche ulëis.
Co funziunea pa i favoric?
I favoric vën salvei tl browser (Chrome, Edge, Firefox, ecc.). Nsci iel mesun marché chemuns, stazions meteo o webcams sciche favoric. L iede do che n va sun la plata recunescerà l browser chësta ujes y mustrerà automaticamënter i favoric.
De mpurtanza
Sce n tol demez la memoria dl browser (cache) o i dac dla plata web va nce i favoric perdui. Te chësc cajo iel de bujën de i seleziuné da nuef.
L ie mesun stampé la plata de uni detail. Per pudëi l fé, tlichëde l pom "Stampa" o "Previjion tl format PDF" japé dla plata.
Duta la previjions ie despunibles coche raporc meteo da ciarië ju y stampé. Jide sun la plata Buletins meteo tl format PDF.
La plata web se adatea automaticamënter ai njins defrënc: desktop, tablet o smartphone. Chël uel dì che i cuntenuc, la navigazion y la funzions resta saurides da liejer y da adurvé sun uni sort de scherm.
L ie mesun nstalé l portal meteo nuef provinziel sciche na app sun l smartphone o tablet. Chësc va nsci:
- Giauride la plata web: cherdëde su la url meteo.provinzia.bz.it tl browser internet dl smartphone, p.ej. Chrome, Safari o Edge.
- Seleziunëde "Junté ala schermeda de scumenciamënt": per l solit cumparëscel sun l smartphone na icona o na usc de menù sciche "Junté ala schermeda de scumenciamënt" o "Nstalé app".
- Cunfermëde: do la cunfërma vën la plata web nstaleda sciche app. L portal meteo provinziel nuef ie senià cun na si icona aposta.
La icona ie donca nluegeda sun la schermeda de scumenciamënt de vosc smartphone, coche pra l’autra apps. La app se gëura riesc, funziuneia te si funestra y ie for saurì azessibla.